Olav Duun-stemnet i Namdalen 2015: Søkelys på kunstnaren

Olav Duun-stemnet i Namdalen 2015 vil bli arrangert på Jøa i dagane 19. – 21. juni 2015. Duun-doktor Grethe Syéd og skodespelaren Ståle Bjørnhaug står på programmet.

Hovudtemaet på stemnet blir “Kunstnaren”.

Mellom anna tek litteraturforskar Grethe Syéd (biletet) for seg Kunstnaren i Olav Duuns dikting. Grethe Syéd skreiv for to år sidan doktorgradsavhandling om Duuns dikting, og ho er sers interessert i korleis Duun omtalar kunstnaren i sine bøker.

Skodespelar Ståle Bjørnhaug blir opplesar på Duun-stemnet. Bjørnhaug har hatt store roller på Nationalteatret, Den Nationale Scene, Det Norske Teatret, Trøndelag Teater og på Den Norska Opera. Han har m.a. spela Didrik i teateroppsettinga Medmenneske av Olav Duun. Ståle Bjørnhaug vaks opp på Verdal, men bor no i Oslo.
– Vi har lenge ønska oss Ståle Bjørnhaug som Duun-opplesar på Duun-stemnet, og no kjem han endeleg, seier stemnesekretær Torgeir Strøm. Bjørnhaug skal ha Duun-opplesing på åpninga av stemnet, på eit arrangement i Dun kirke laurdag kveld og på fotturen i Duuns diktarlandskap på søndag, som går ut mot Follahavet.
- Vi gler oss til å høyre Ståle Bjørnhaugs malmfulle røst, seier Strøm.